Los equipamientos públicos y privaos conmemoren esta xornada dedicada, nesta edición, a los museos pola educación y la investigación

El Gobiernu d’Asturies súmase a la celebración del Día Internacional de los Museos, que se celebra’l sábadu viniente 18 de mayu, con 80 actividaes repartíes per tola rede de museos de titularidá pública y privada del Principáu.

La Conseyería de Cultura, Política Llingüística y Deporte coordinó la programación d’esta conmemoración que se dedica, esti añu, a los Museos por la educación y la investigación. Asina, Cultura destaca’l papel de los equipamientos culturales asturianos como motor de conocimientu y espacios onde investigar y estudiar, ayudando a arriquecer les cultures y favoreciendo un intercambiu cultural que posibilite l’exerciciu d’una ciudadanía llibre.

En concreto, los 17 conceyos onde se van desenvolver actividaes esta selmana pa celebrar el Día Internacional de los Museos son: Valdés,  Tapia,  Teberga, Tinéu, Ribeseya, Santu Adrianu, Somiedu, Uviéu, Quirós, Llanes, Grandas de Salime, Navia, Gozón, Xixón, Avilés, Carreño, y Colunga.

Los equipamientos culturales xestionaos pola Conseyería de Cultura confeccionaron una programación bayurosa pa estos díes coincidiendo cola celebración y onde hai que destacar:

Muséu de Belles Artes d’Asturies

El Muséu de Belles Artes d’Asturies va poner la nota musical a la conmemoración de los museos cola edición de Cuadros Cantados VI, al cargu del artista Nacho Vegas. Vegas va interpretar seis cantares onde la so música va entrelllaciase con dalgunes de les obres pertenecientes a la colección del muséu. Al mesmu tiempu, tamién se programaron actividaes pa neños y neñes d’ente 4 y 12 años.

Tola información ta disponible en  https://www.museobbaa.com/

Muséu Arqueolóxicu d’Asturies

Delles pieces d’incorporación nueva van presentase públicamente nel marcu d’esta conmemoración que rinde homenaxe a los museos. Concretamente, esti actu va ser el vienres 17 de mayu nel propiu Arqueolóxicu

Tola información ta disponible en  www.museoarqueologicodeasturias.com

Muséu del Xurásicu d’Asturies

El sábadu la entrada al muséu más visitáu d’Asturies va ser gratuita, asina como l’arrendamientu de les audioguíes que dexen disfrutar de los conteníos espositivos del Muséu del Xurásicu. El sábadu y el domingu, los neños y neñes van ser protagonistes de la programación al traviés d’un taller sobre fósiles. 

Tola información ta disponible en www.museojurasicoasturias.com

LLABoral Centru d’Arte y Creación Industrial

Trés visites guiaes en LLABoral completen la programación del sábadu. La primera va ser al mediudía sobre la muestra que percuerre la trayectoria del artista asturianu Rodrigo Cuevas. La segunda sobre la esposición Parasimón y la tercer visita va ser a Motores del clima.

Tola información ta disponible en https://laboralcentrodearte.org/

Muséu Barjola

El muséu xixonés va acoyer una actividá educativa y interxeneracional, dientro del lema de la celebración del Día de los Museos, que va ayudar a comprender el valir nel arte de los pigmentos y el color. Ta dirixida a neños y neñes a partir de 4 años. 

Centru d’Arte Rupestre de Tito Bustillo

Va desenvolvese una visita guiada colos comisarios a la esposición temporal Piedra, papel y pincel, la reproducción del arte prehistórico en Asturias, asina como un taller familiar.

Tola información ta disponible en www.centrotitobustillo.com

Parque de la Prehistoria de Teberga

Con entrada de baldre, esti equipamientu cultural celebra’l Día de los Museos con visites guiaes y xuegos de mesa familiares colos que poder revivir la vida de los humanos na Edá de Piedra.

Tola información ta disponible en https://www.parquedelaprehistoria.es/

Muséu Etnográficu de Grandas de Salime Pepe el Ferreiro

La xornada cultural en Grandas de Salime va tar centrada na proyección y charla-coloquiu sobre’l documental Frutos d’úa terra: memoria inmaterial da etnografía alimentaria. Al empar, van desenvolvese xuegos tradicionales nos espacios albentestate del propiu muséu.

Tola información ta disponible en https://www.museodegrandas.es/

Programa d’actividaes